ललितपुर, १६ पुस ।
आगामी फागुन २१ गते हुने निर्वाचनका लागि नेपाली कांग्रेसले बुझाएको समानुपातिक उम्मेदवारको सूचीमा ललितपुर जिल्लाको प्रतिनिधित्व शून्य बनाइएको भन्दै जिल्लाका तीनै जना क्षेत्रीय सभापतिहरूले कडा आपत्ति जनाएका छन्।
पार्टी नेतृत्वले जिल्लाको भूगोल र कार्यकर्ताको योगदानलाई अवमूल्यन गरेको ठहर गर्दै ललितपुर क्षेत्र नं. १ का सभापति सुन्दर तामाङ, क्षेत्र नं. २ का सभापति महेश खड्का र क्षेत्र नं. ३ का सभापति महेश्वर थापाले संयुक्त रूपमा विरोधको नेतृत्व गर्ने घोषणा गर्नुभएको छ। ललितपुरका तीनवटै निर्वाचन क्षेत्रबाट एक जना पनि उम्मेदवार नसमेटिनुले जिल्लाभरका कांग्रेस कार्यकर्तामा निराशा र आक्रोश पैदा गरेको छ।
केन्द्रको यो विभेदकारी निर्णय सच्याउन र ध्यानाकर्षण गराउन भोलि पुस १७ गते दिउँसो १२:३० बजे तीनै सभापतिको नेतृत्वमा ध्यानाकर्षण पत्र बुझाउने कार्यक्रम तय गरिएको छ। यो लडाइँ सिंगो ललितपुरको न्यायका लागि भएको बताउँदै सबै कार्यकर्तालाई उपस्थित हुन आह्वान गर्नुभएको छ।
सभापतिहरू तामाङ, खड्का र थापाले केन्द्रको यस कदमले आगामी निर्वाचनमा समेत नकारात्मक असर पर्न सक्ने भन्दै तुरुन्तै सच्याउन माग गरेका छन्।
@shinenews
