ललितपुर । श्री बागमती आधारभूत विद्यालयका विद्यार्थीहरूलाई सोमबार एक कार्यक्रमका बिच ट्र्याकसुट, स्कुल ब्याग र स्टेसनरी सामग्री वितरण गरिएको छ। Metta Nepal को सहयोगमा विद्यालयमा अध्ययनरत आर्थिक रूपमा विपन्न तथा जेहेनदार विद्यार्थीहरूलाई लक्षित गरी उक्त सहयोग प्रदान गरिएको हो।
वितरण कार्यक्रममा संस्थाका प्रतिनिधि गौतम महर्जन तथा अन्य स्वयंसेवकहरूको उपस्थिति रहेको थियो। सामग्री ग्रहण गर्दै विद्यालयका प्रधानाध्यापक सन्तोष लोप्चनले सहयोगी संस्थाप्रति आभार व्यक्त गर्नुभयो। उहाँले विद्यार्थीहरूको शैक्षिक सुधार र प्रोत्साहनका लागि यस्ता मानवीय कार्यले ठुलो ऊर्जा दिने बताउनुभयो।
प्रधानाध्यापक लोप्चनले व्यक्तिगत र विद्यालय परिवारको तर्फबाट Metta Nepal लाई धन्यवाद दिँदै संस्थाको उत्तरोत्तर प्रगतिको कामना गर्नुभयो। साथै, आगामी दिनहरूमा पनि विपन्न बालबालिकाहरूको शिक्षाका लागि यस्तै सहकार्य र सहयोगको अपेक्षा गरिएको उहाँले उल्लेख गर्नुभयो। यस सहयोगले जाडो मौसममा विद्यार्थीहरूलाई विद्यालय आउन थप सहज हुने विश्वास लिइएको छ।
@shinenews
